الساعه الثانيه صباحا
الكل نائم فى المنزل و انا كعادتى الخفاشيه بصفتى كائن ليلى سهران بعد خناقه عائليه كالعاده انتهت على مافيش
المهم لقيتنى واخد كرسى البحر الللى فى البلكونه و فرده و اخد معايا علبه السجاير و كبايه العصير و قاعد بقى
الجو يعمه هدوء تام و طبعا طردت فكرتى الشريره المتطفله بمعرفه ما يدور خلف كل شباك مغلق امامى
يااااه احساس حلو قوى و الواحد قاعد لوحده كده و ممدد و سايب دماغه تروح فى اى حته
لقيتنى مره واحده افتكرت اصحابى يمكن علشان كنا بنقعد كده مع بعض من زمان
خلاص بقى كل واحد فينا بقى فى بلد
غير التانيه
و انا هنا فى البلكونه يا عالم كل واحد فيهم بيعمل ايه دلوقتى
ما علينا علشان ما اغمش نفسى افتكرت يومين كدخ كنت قضيتهم من اسبوع تقريبا فى معسكر كنت معزوم علي شرفه كقائد تحكيم فيه لجواله الكليه
و ده كان فى اداره البحريه المصريه فى بحرى
و الله كانوا يومين حلوين
الواحد كان عمال يبص للولاد الصغيره اللى لسه داخلين الكليه جديد او حتى اللى بقالهم فتره كلهم بيشتغلوا كده و بيتدربوا
الواحد افتكر لما كان قدهم كده و بيبص على الناس الكبيره و على التحكيم و يقول لنفسه امتى هبقى كده
مستعجلين على ايه بس
ديه احلى ايام اللى انتوا فيها دلوقتى
و اللا مجموعه البناتيت اللى كانوا هناك و الله بنات تفرح كلهم مقاس واحد تقريبا
ما علينا بقى من جو الهزار و الضحك خصوصا فى حفله السمر بالليل
و اللا اللى بيحصل بقى فى الاوضه قبل النوم
العيال بتطلع الكبت اللى بيشوفوه فى الكليه كله فى اليومين دول
ايه ده انتى فى بالى
انا ماكلمتكيش بقالى يومينبس سمعت صوتك النهارده بجد كنت فرحان جدا و خصوصا انك قولتى انك احتمال تيجى فى الاسبوع ده
هو انتى ما اتصلتيش بيا ليه
اكيد مش معاكى رصيد
المهم بجد وحشتينى
يااااااه الساعه بقت اربعه الصبح و كمان علبه السجاير فاضل فيها واحده بس
خلاص خليها للصبح بقى بدل ما انزل و انا لسه صاحى
تحت البطانيه و سيب نفسك بقى
تصبحوا على خير
