بمناسبه العيد تاج جديد

التاج ده تمريره تمر حنه و ربنا يستر بقى لانها اول مره بصراحه ارد على تاج

لو قالولك تختار اى عصر تعيش فيه تختار اى عصر و فى اى عهد و مين الحاكم و اشمعنى

بصراحه انا مش هحدد عصر معين بس احب اكون فى اى وقت ارجع فيه طفل صغير بدون مسؤليات و لا رغبات و ساعتها هكون حاكم جمهوريه نفسى

يعنى هختار عهد الطفوله

اول اوليه فى حياتك عيلتك و اللا صحابك و اللا شغلك

لة رديت بواقعيه الزمناللى احنا عايشين فيه هقول عيلتى فشغلى فاصحابى

بس لو رديت بواقع شخصيتى انا هقول اصحابى و طبعا اللى هما اصحابى بجد يعنى اللى عايشين و عارفين حلمى و بعديها عيلتى و ثم شغلى و طبعا انا وقولت عيلتى لانى بجد بحاول انول رضاهم لانى بجد محتاج دعواتهم جدا خصوصا الفتره ديه

ايه اكتر حاجه بتحبها فى رمضان

بصراحه اكتر حاجه لمتى انا و اصحابى لما بنتفق اننا نفطر مع بعض فى يوم

او نتسحر

ساعتها بنختار اى مكان على البحرو نجيب الاكل و نقعد بعدها بقى قعده بجد مش ناسى اى يوم منها على الرغم انهم ايام كتير

اوصف اجمل فطار ممكن تفطره

يا سلام الواحد بيسمع السيره ديه ريقه بيجرى

يعنى يبقى كده فيه مكرونه بشاميل و فراخ محمره و يا سلام بقى لو جنبهم طبق طحينه

و الختام كبايه عصير مانجه و مع قطايف

و سلملى بقى على التلبك المعوى و كيس الفوار

لو انت حاكم على مجموعه هتبقى عادل و هتعرف منين ان انت عادل

بصى يمكن انا جربت انى اكون مسؤل عن مجموعه و خصوصا انهم كانوا شباب زىى يعنى اما موضوع انى اكون عادل اكيد هحاول طبعا انى اكون عادل و ده هعرفه من عنيهم يعنى من حبهم ليا

لان فى حاله ان الواحد يكون حاكم لو كان عادل بجد هيبقى محبوب من اللى حواليه و ده طبعا مش بيحصل اللا اذا كان قريب منهم

ايه اللى بيبوظ الحكام نفسهم و الا شعبهم و اللا الحاشيه المقربه

ما اقدرش اقول انه يبقى سبب واحد بس لانها بتبقى مجموعه اسباب مجتمعه يعنى طالما الراس فسدت يبقى اكيد كله تحت منه هيبقى فاسد

و خصوصا لو سلم الحاكم ودنه او صابه الغرور و حب السلطان

مين اكتر اعلامى مصرى بتحترمه

صدقينى لو قلتلك مافيش

يعنى انا شايف ان الاعلام فى مصر كله عباره عن تمثيليه حلوه و مسبوكه بس ساعات بتبقى ريحتها وحشه و بتتفقس نهايتها قبل بدايتها

لو تتمنى انك تشتغل شغلانه تانيه غير اللى انت بتشتغلها هتختار ايه

كنت هختار انى ابقى طيار يعنى بطبيعتى انا بحب السفر و بكره الملل و الثبوت فى مكان واحدو بعدين ده كان حلم من و انا صغير

بس تقولى ايه بقى لكلام العيله الله عليك فى البلطو الابيض

و كان البلد ناقصه دكاتره

ايه تانى بلد تتمنى انك تعيش فيه

يعنى انا هقولك بلدين اولهم ايطاليا

حيث الحياه و الصخب و حضاره فى نفس الوقت

و التانيه هتبقى امريكا بلد الحريات حتى لو كانت مصطنعه بس كفايه الواحد يحس انه قادر انه يبنى نفسه

ما تعرفيش حد يظبطلى فيزه؟

اوصف اجمل ترتيبات فرح ممكن تحضره

بصى انا هقولك على حاجه اجمل فرح هو اللى بجد احس انه بتاع واحد او واحده قريبين منى قوى يعنى ابقى مشارك معاهم فى كل حاجه فى الزفه و فى الفرحو يمكن كمان انا اللى ازفهم بنفسى و ده حصل كتير على فكره

بس لو على الماكن نفسى بجد يا اما يبقى على البحر او فى جنينه فله يعنى يبقى خارج الافراح التقليديه

بتراعى كلام الناس فى حياتك و قول ليه

لالالالالالالالالالالالالالالالالالالا طبعا و بدون تفكير يعنى انا ببقى مقتنع انى طالما انى مش بضر حد يبقى ماحدش له عندى حاجه و بعدين كمان انا مش بحب حوارات السلالم و الكلام و الحوارات

كل واحد ادرى بظروفه

صحيت لقيت مافيش موبايل و لا كمبيوتر و لا كاميرا ديجيتال و رجعنا لعصر الحمام الزاجل و الحصنه

هتعمل ايه

هههههههههههههه

و الله فكره حلوه ساعتها بقى هنرجع تانى للرسايل المكتوبه بقى و اخد حبيبتى ورايا على الحصان

و هتبقى ليله حلوه يعنى

و الواحد هيريح عينيه بقى و يرتاح من صاع الرنات

بس اهم حاجه الحمام يكون فيه خاصيه البلو توث

يعنى بتوفر كتير قوى

السعاده هيه ايه

السعاده هى مساله نسبيه بحته

بس بالنسبالى هى انى انام و مش افكر فى اى حاجه لبكره يعنى انى انام و بالى مرتاح

اى كانت الظروف و التضاربات

عندك امل و اسبابك

اكيد عندى امل على الاقل انى اكون نفسى اللى انا عايزها و السبب انى عايش و و السبب التانى ثقتى فى نفسى و فى قدراتى اللى حاسس انها مالهاش حدود

لما بتحب تهرب من كل شىء بتروح فين

بصى انا مش عادتى انما اهرب بس لما بحب انى اقف مع نفسى و ابعد علشان الاقيها تانى يبقى فى مكان واحد عند حته على البحر اسمها بير مسعود صخرخ عاليه على البحر و و علبه السجاير و تفكير عميييق قوى

مره اخدت فيها نفس عميق و قلن ياه انا كبرت قوى

كل يوم تقريبا بقول كده بس بحاول اخرج من الحاله ديه بسرعه علشان مش ببقى حابب انها تتحكم فيا

لما بتعمل عمل خيرى ايه بيبقى الدافع عندك

اكيد الدافه هو ثواب العمل ده و بعديها فرحه اللى قدامى باللى انا عملته بس اهم حاجه يكون العمل ده خارج نطاق اى تمثليله مزيفه من ادعاء الخير و الفضيله

بتشرب سجايرو ايه شعورك لو شفت واحده ست بتشرب

اه بشرب و يمكن يكون كتير كمان

اما عن الست اللى بتشرب سجاير فهى حره تعمل اللى هى عايزاه بس اكتر حاجه ممكن تدايقنى انها تكون فى الدرخ يعنى طالما انا بعمل حاجه انا مقتنع بيها يبقى ما ينفعش انى اكون جبان و بعدين ما حدش وصى على حد لانه ببساطه ماحدش فينا ملاك

بتعرف ايدك اليمين من الشمال ازاى

ههههههههههههه

اليمين اللى باكل بيها و الشمال اللى مش بعرف اكل بيها و ببهدل الدنيا حواليا

اكتر اله موسيقيه بتحبها

هما التين الدف او البندير لانى متعلق بيه من زمان و الناى لانه بيودينى فى دنيا تانيه

فى رايك ليه الذوق و النخوه اتعدموا

لانه ببساطه كله بقى بيقول ياللا نفسى يعنى كله بيدور على مسلحته و ماحدش بيرضى انه يغصب على نفسه حاجه هو مش عايزهاو بالتالى بتكون النتيجه انه بيقول انا و من بعدى الطوفان

ايه الحاجه اللى لو حصلتلك تبقى سعيد قوى

انى اخلص دراسه بقى علشان العمليه سخت و طولت

و تانى حاجه انى الاقى الناس بتقول الله ينور على اى عمل فنى انا بعمله خصوصا فى الاخراج

تختار يبقى عندك ارض زراعيه و اللا احسن عربيات و اللا فلوس فى البنك

بصراحه فلوس فى البنك لانى لو حبيت اعمل اى حاجه انا عايزها ساعتها هقدر اعملها و اشترى بيها اللى انا عايزه

البحر و اللا النيل

البحر طبعا يعنى ده عشره عمر ياما شافنى و انا قوى و ياما شكيتله و انا ضعيف

مركب و اللا طياره

طياره اكيد بصراحه انا ما عنديش طوله بال

و كمان يمكن اكون بفتقد الرومانسيه الشديده اللى فى المركب

مجنون و اللا عاقل

مجنون جدا لدرجه العقل

تقرا كتاب و اللا تتفرج على فيلم

اقرى كتب لانى هتخيل الفيلم اللى انا ممكن اعمله من الكتاب

بتمرر التاج لمين

امم

ايه التد بيسه ديه

ماشى ياللا بقى

امرره لعقريت السياله و لسندريلا

و النبى مش تزعلوا منى

ده انا غلبان