كلاكيع للبيع

الموضوع ببساطه انى فى يوم جه فى دماغى مجموعه من الناس اللى بتعامل معاهم يوميا تقريبا منهم طبعا القربين جدا ليا و منهم برده اللى اصحاب و معارف و خلاص

و لقيت ان كل واحد فيهم جواه كلكوعه مكعبره او يعنى عقده جواه بقت هيه المكونه لشخصيته او بقت هى المحرك الاساسى لكل تصرفاته و اكيد بنظريه النسبه و التناسب يبقى اكيد اغلبيه الناس برده كده

دور على عقدتك بقى فى الامثله اللى جايه

car cash

واحد صاحبى من زمان ياما اتخانقنا و يا ما اتصالحنا الملخص انه ولد راجل جدا اللا عند العقده -البنات

الواد من كتر ما عرف بنات و ارتبط احيانا و اتقلب برده احيانا بقى الهدف الاساسى فى الحياه هو الحريم يعنى لما البنت تقف الدماغ اوتوماتيك تقف

النتيجه-بقى اصعب قرار عنده انه يمسح نمره بنت من على تليفونه

اعرف صاحبك و علم عليه

zankalon

انتيمى اللدود

ده بقى على النقيد تماما

اكبر عقده فى حياته انه عمره ما ارتبط ببنت اكتر من اسبوع

يمكن ده عيب فى شخصيته يمكن ما فيش واحده ملت دماغه

المهم الحياه اصبحت فى فراغ تام خصوصا بعد ما اتخرج بقت القاعده على القهوه و الفرجه على اللى رايحه و اللى جايه هى الحاجه الوحيده اللى بتتعمل

النتيجه-الواد بقى فى حاله سطل مستمره من كتر الشرب لدرجه انه بقى العاده المقدسه اللى بتخليه يفك من الاكتأب اللى عايش فيه

jolia

بنوته دلوعه صغنطوطه دماغها متركبه غلط

عقدتها انها عايشه مع اب و ام منفصلين بس عايشيين فى بيت واحد و كل واحد بيحاول يشدها ليه لدرجه ان الموضوع قلب بنتيجه عكسيه من الكبت

البنت مش لاقيه اى نوع من الخصوصيه او الحريه فى حياتها بقت مرعوبه من كلمه انتى تربيه واحده ست

النتيجه- حاله من الاكتاب المستمر مع بعض فترات من التهييس و الهيبره

و رغبه مستمره انها تهج من البلد كلها لمجرد انها تعيش حريتها

و رفض تام لاى نوع من الارتباط

ربنا يستر

jeminem

مجموعه كلاكيع من اب ديكتاتور بقى ضابط متقاعد لقصه حب فاشله لرسوب متكرر فى الكليه مع انه فى اخر سنه

اضياع احساسه باى حاجه جديده ممكن تغير حياته

النتيجه-التردد فى كل قراراته طظ فى اى حب تانى الحياه كلها سوده

zzzzzzzzz

اللى يشوفها يقول البنت المهيسه اللى لازم تكون موجوده فى رحله

بس المشكله انها عمرها ما اتحبت او ارتبطت يمكن بس تكون حبت و ده يمكن لان الكل بيتعامل معاها على اساس انها واحد صاحبنا لدرجه انها بقت بتتجن كل ما تسمع عن اى موضوع ارتباط و تقعد تقول ايه لازمته ما كل واحد يبص لمستقبله احسن

النتيجه-ماحدش يقولها عن اى حوار زى ده يا جماعه هيه مش ناقصه

طبعا بعد كل ده و فيه امثله تانيه كتير اكيد انا مش الواحد النقى الابيض من جوه

ده يمكن انا اكون الكوكتيل الجميل من كل ده و كمان انا ما اعرفش غيرى بيبص ليا ازاى

المهم فى الاخر حد لقى اى كلكوعه على مقاسه

الااونا........الادوا..........الاتريه